Ruottin teeveen (SVT) meänkielisen redaksuunin eksperimentellinen programmi «Bastuballetten» oli niin populääri ette siitä tullee uusi osa.
Sen filmathaan kesälä. Tämän muistelee svt.se.
SVT kirjoittaa ette programmi oli otettu hyvin vasthaan sekä Ruottisa ette ulkomaila, eriliikaisesti toisissa pohjaismaissa. Sitä oon praamattu sekä tavalisissa ette sosiaalisissa meedioissa.
Koreograafivaimo, viisi äijää ja sauna
Programissa oon yksi koreograafivaimo Tukholmasta, jolla oon pieni plaana kunka saunabaletin tehhään, ja viisi tornionlaksolaista miestä. Kaksi miehistä oon musikkerit, yksi oon ollu politikkeri. Baletti ei ole kenelekhään tuttu mutta se toinen oon sitäki enämen tuttu. Mutta sauna ja baletti? Ja eikö se baletti ole knapsua?
Väylä, rantaniityt, mettä, Luppiovaara, valkkeet kesäyö, musikki ja sääsket annethaan baletile raamit. Miehet treenathaan balettii yksin ja erilänsä, ja välilä het praatithaan ja muistelhaan kameran eessä sekä omasta elämästä ette tästä prosjektista missä het oon myötä.
Programmivastaava Mattias Barsk oon hunteerannu miksi publikummi oon niin tykäny tästä.
– Se oon piian siksi ko tavaliset ihmiset oon pääsheet esile. Heän muistelukset oon tulheet ulos teeveeruudun läpi. Heän avula tullee kans näkkyyvile elämäntapa ja semmoinen osa maata mikä ei tavalisesti nävy ollenkhaan, Barsk analyseeraa.
Hän muistelee ette kesälä het jatkethaan muutamasta samasta teemasta mitkä tulthiin esile ensimäisessä osassa.
– Näjemä sitte mihiin se meät vie, Barsk sannoo.
