Denne gjengen får den kvenske språkprisen

Grunngjeving frå juryen for tildelinga av den kvenske språkprisen for 2025

Vinnaren av den kvenske språkprisen for 2025 er omsetjarane ved Kainun institutti – Kvensk institutt.

Kainun institutti – Kvensk institutt blei stifta i 2005, same år som kvensk fekk status som offisielt minoritetsspråk i Noreg. Sidan starten har instituttet tilbydd omsetjingar mellom norsk og kvensk som ei av tenestene sine. Omsetjingar frå norsk til kvensk utgjer ein omfattande del av den totale mengda kvenske tekster som er skrivne i nyare tid, og det bidraget som omsetjarane ved instituttet på denne måten gir til framveksten av eit levande skriftleg kvensk språk, kan difor ikkje overvurderast.

Instituttet set om tekster frå offentlege organ og institusjonar, men har òg vore med på å omsetje tekster for privatpersonar og frivillige foreiningar, og instituttet gir dessutan rettleiing til andre som driv med omsetjing frå norsk til kvensk. Mange tekstsjangrar, frå songar og eventyr til læremiddel, frå nettsider til spørjeundersøkingar og frå rapportar til utstillingstekster, har fått kvensk språkdrakt av omsetjarane på instituttet.

Den kvenske språkprisen er mellom anna meint å løfte fram dei som gjer ein stor innsats for det kvenske språket utan å ha fått offentleg merksemd for det tidlegare, og dette gjeld i høgste grad omsetjarane ved Kainun institutti – Kvensk institutt. Ved å gi prisen til omsetjarane vil juryen òg løfte fram omsetjing som ein relevant karriereveg for dei som studerer kvensk, ein karriereveg som no er blitt lettare å komme inn på gjennom det nyopna studiet i kvensk omsetjing ved Universitetet i Agder.

Desse omsetjarane arbeider ved Kainun institutti – Kvensk institutt: Merethe Eidstø Aili Eriksen Reidulf Høybakken Mari Keränen Tobias Kvalness Riinakaisa Laitila Karin Larsen Pirjo Paavalniemi Anna-Kaisa Schultz Räisänen

Juryen gjer merksam på at ein av omsetjarane, Mari Keränen, har vore medlem i juryen i år. I jurymøtet var det dei andre to medlemmene, Madsen og Olufsen, som nemnde omsetjarane blant sine favorittar frå nominasjonslista. Då det difor blei klart at omsetjarane låg an til å kunne vinne i siste avrøysting, erklærte Keränen seg ugild og forlét møtet, slik at de to andre medlemmene røysta åleine.

Kilde: Språkrådet