Hilja Huru. (Arkivfoto: Heidi Nilima Monsen)
Isotinka oon nimittänny tottuuskommisuunile kolme sekretäärii jokka oon työtelheet tyhä saamen assiitten kans.
Liisa Koivulehto
liisa@ruijan-kaiku.no
Ruijan kveeniliitto oon reageerannu tähän.
Les denne saken på norsk her: – Har Stortinget allerede glemt kvenene
Sekretariaatin johtaaja Liss Ellen Ramstad (38) oon työtely Saametingassa ja komunaalideparttementissa viimiset 12 vuotta.
Cathrine Baglo (48) tullee Verdalista. Hän oon tutkinu saamelaissii 18 viimi vuotta, Saametingan ja Tromssan universiteetin prosjekteissa.
Inger Elin Utsi (43) oon toimittaja (Altaposten, NRK ja TV Nord) joka oon työtely kans Tromssan universiteetin hallinossa.
Monta rikkomusta
Kveeniliitto osoittaa ette näilä keneläkhään ei ole kväänin kulttuuritavusta.
– Kväänit oon unheetettu. Tämä valinta rikkoo komisuunin mandaatin prinsiippii, Ruijan kveeniliiton johtaaja Hilja Huru sannoo.
Isotinka ei ole ottanu kontaktii kvääniliithoon prosessin aikana.
Kveeniliiton varajohtaaja Jan Daleng pelkkää ette kväänit ei uskala ottaat kontaktii sekretariaathiin, erittäinki jos sinun assii oon kippee, ko sielä ei ole kethään kuka ymmärtää sinun kieltä ja mikä sinun kulttuurin tila oon.
Kveeniliitto vaattii ette sekretariaathiin valithaan yksi ihminen jolla oon kväänin kielen ja kulttuurin ymmärys
