Jouluin färit vaikuttaavat siihen miltä ruoka maistuu

Färiekspertit meinaavat ette vihrinen talerkkipyntti passaa erittäinki ko ruokana oon pinneköttiä ja koleraapistappia. (Kuva: Tork LinStyle)

 

Usheimat oot kuulheet ette färit vaikuttaavat sekä humöörhiin ja tunteishiin. Mutta tiesitkö sie ette färit saattaavat vaikuttaat siihen kunka ruoka maistuu?

 

Liisa Koivulehto
liisa@ruijan-kaiku.no

Jouluina käytethään paljon punaista ja vihristä pynttiä. Vihrinen passaa hyvin keltaisen kans. Siksi vihrinen servietti, talerkki eli tuuki passaa hyvin ko lautasella oon esimerkiksi juurikaali-(koleraapis-) stappia.
Punainen vähenttää kirmeeta makkuu ja ruoka maistuu makkeemalta – eli se passaa päälysruvan kans. Ko oon punainen soosi ja punainen servietti sie saatat vähenttäät sukkeria!

– Tämä oon tutkittuu tiettoo, muistelee Tork-firman produkti- ja markkinajohtaaja Christine S. Rød.
Amerikassaki tätä oon tutkittu: Meitä voi puijata färin avula. Ihmisille annethiin erilaisia drinkkiä mutta klashiin oli lisätty «väärää» färiä. Ko kirsikkajuoman oli färjätty oransiksi, ihmiset luulivat ette se oon appelsiinia. Ko saman juoman färjäthiin vihriseksi, ihmiset meinasivat ette se oon limejuoma.
Färit saattaavat muuttaa kokonhansa sen kunka met kojema sekä mavun ette temperatuurin. Lisäksi färit vaikuttaavat meän tuntheishiin.

Tässä oon färieksperttiin färikartta ruokapöythään:

Punainen: Vähenttää ruvan karvasta makkuu. Ruoka maistuu makkeemalta. Soppii päälysruvan ja erittäinki marjoin kans.
Vihrinen: Soppii keltaisen ruvan kans: Koleraapis, curry, safraani eli kurkemeia.
Valkkee: Neutraalit färit soppiivat punaisen soosin, punaisen lihan ja tomaatin kans eli ylheensäki jos ruvassa oon vahvat färit.
Keltainen: Nostaa esile happaman mavun ja siksi se passaa kala- ja meriruvan kans. Se anttaa tasapainoo vihriselle salaatille.
Sininen: Neutraliseeraa suolaista ja tuo esile keltaisen ja oransin. Merensininen soppii munaruvale, intialaisele ruvale, bearnaisesoosile jne.
Musta: Musta ja muut tummat färit (-ruskee, -harmaa) anttaavat luksusta pöythään ja ruvale. Tumma färi passaa vaaleele ruvale niinko turska eli pallas.