Foto: Arkiv

 

Jouluevankeeliumi, Luukas, 2. 1-20.

 

 

Ja se tapattui niinä päivinä ko keisari Aukustus oli päättäny ette koko mailma piti maksaat verroo.
2. Tämä veronmakso oli se ensimmäinen, ja se tapattui sillon ko Kviriinius oli Syyrian maaherrana.
3. Ja kaikin menthiin sinne kirjottamhaan ittensä verolisthoin, kukaki omhaan kaupunkhiin.
4. Jouseppi lähti Kalileasta, Naasaretin kaupungista, Juutehaan, Taavetin kaupunkhiin, Peetleheemhiin, sillä hän oli Taavetin huonetta ja sukkuu,
5. ja sielä hänen piđethiin kirjottaat verolisthaan kihlatun Maarian kansa joka oli ođottamassa lasta.
6. Ja ko het olthiin sielä, se synnyttämisaika tuli,
7. ja hän synnytti pojan, esikoisen, kapaloitti hänen, ja pani hänen soimheen. Sillä heile ei löytyny sijjaa kestikievarista.
8. Siinä likelä oli paimeniita jokka olthiin paimentamassa laumaa sinä yönä.
9. Äkkii seisoi Herran enkeli heiđän eđessä, ja Herran kirkhaus loisti heiđän ympäri, ja het pölästythiin kauheesti.
10. Mutta enkeli sanoi heile: ”Älkkää pöläkkää! Mie tuon teile ison ilon, ilon koko kansale;
11. Tääpänä oon Taavetin kaupungissa syntyny teile Vapattaja; hän oon Kristus, Herra.
12. Ja tämä oon teile merkkinä: Tet löyđättä lapsen joka kapaloittuna makkaa soimessa.”
13. Ja siinä samassa oli enkelin ympäri iso roikka taivhaalista sotaväkkee, jokka ylistethiin Jumalaa ja laulethiin:
14. ”Kunnia olkhoon Jumalale korkkeuksissa ja maassa rauha ihmisile joita hän rakastaa.”
15. Ko enkelit olthiin jättänheet heiđät ja menheet takasin taivhaasheen, paimenet sanothiin toinen toisele: ”Menemä nyt Peetleheemhiin kattomhaan onko se tapattunu niin ko Herra ilmotti meile.”
16. Ja het hopussa lähđethiin sinne, ja löyđethiin Maarian, Jousepin ja pikku lapsen joka makais soimessa.
17. Ko het huomathiin hänen, het sitte muistelthiin kaikki mitä olthiin kuulheet lapsesta.
18. Kaikin jokka olthiin kuuntelemassa, ihmetelthiin sitä mitä paimenet muistelthiin.
19. Mutta Maaria korjais kaikki nämät sanat omhaan syđämheen ja hunteeras niitä.
20. Paimenet jätethiin tallin, kiitethiin ja ylistethiin Jumalaa siitä mitä olthiin kuulheet ja nähnheet; kaikki oli justhiin niin ko heile oli sanottu.

Kväännös: Terje Aronsen, 09.11.05.