Tente lys kan også passe bra for å gratulere Finland og finlendere med sin selvstendighetsdag i dag fredag 6. desember. (Foto: Liisa Koivulehto)
Miksi suomalaiset polttaavat kynttilöitä ikkunalla tänä iltana 6. desemperikuuta?
Liisa Koivulehto
liisa@ruijan-kaiku.no
Nykyaijan suomalaiset oon oppinheet ette kynttilöitä poltethaan ittenäisyyspäivän iltana ittenäisyyđen tähđen.
Suomesta tuli ittenäinen valtio vuona 1917 mutta kynttilöitten polttaminen ikkunalla oon paljon vanhempi tapa.
Kynttilöitä oon histoorian aikana poltettu eri aikoina eri syistä.
– Ruottin vallan aikana kynttilöitä poltethiin kuninkhaile ja Ryssän vallan aikana se oli protesti, arkkiivitutkiija Juha Nirkko Suomalaisen Kirjallisuuden Seurasta selvittää MTV uutisten artikkelissa.
Ryssän vallan aikana kynttilöitä poltethiin Runebergin päivänä 5. februaarikuuta.
Vasta kaksi vuotta ittenäistymisen jälkhiin, vuona 1919 kynttilöitten polttamisesta 6. desemperikuuta tuli tapa. Vuona 1927 Itsenäisyyden Liitto ehđotti ette kynttilöitä poltettais illalla kello kuuđesta yhđekshään mutta jokhainen päättää tietenki itte, se ei ole niin tarkka.
Putikiissa myyđhään nykyaikana sinivalkoissii kynttilöitä mutta kynttilät ei tarvitte olla justhiinsa sen färiset. Ja kynttilöitten lukumääräkhään ei ole määrätty.
Mutta miksi kynttilöitä oon kaksi? Tälle oon annettu eri aikoina eri symbooliita, mutta selitys saattaa olla simppeli ja praktilinen.
– Monet oon oppinheet ette toinen kynttilä oon kođile ja toinen isänmaale. Mutta selitys saattaa olla kans se ette vanhoissa ikkunoissa oli kaksi ruuttuu ja se passasi hyvin ette kummassaki ruuđussa oli yksi kynttilä, tutkiija Nirkko selvitti MTV:n uutisille.
Valkkeetki kynttilät oon aivan passelit. (Kuva: Liisa Koivulehto)
