Kainulainen teekakko

Åshild Karlstrøm Rundhaug tar vare på kvensk baketradisjon, her i form av kvensk tekake. Kuva: Arne Hauge

 

Maistuuva suussa ja helppo leippoot.

 

Arne Hauge
arne@ruijan-kaiku.no

 

Åshild Karlström Rundhaug maistoi kainulaista teekakkoo jo lapsena Alattion Lankovuonossa. Hän oon kasunu tämän mavun kans. Hän opetti teekakon leipomista Lankovuonopäivilä. Hän muistelee ette Tanmarkussaki oon yksi tämän kakon variantti – «brunsviger.» Åshild uskoo ette kainulaiset oon vienheet sen sinne. Ruijassa tämmöinen teekakko oon tunnettu melkkein tyhä pohjaisessa.

Ohukainen leipä

– Kainun teekakko oon noppee ja helppo tehđä. Taikinassa oon tyhä perusainheita ja sie saatat levittäät sen kävelilä eli käsilä. Koska kakko oon ohut, se oon noppee paistaat. Sen paistethaan uunissa ko ohukaisen leivän. Sie saatat kans paistaat sen komfyyrin päälä, mutta silloin sen häyttyy käänttäät välilä, muistelee tämä ruokaekspertti.

Maistuuva ja täyttäävä

Kainulainen teekakko passaa hyvin sekä evhäänä ette kaffi- eli teepöyđässä. Se oon pehmee mutta se ei huilaa ja se oon kuiva ilman ette siitä lohkee murui. Se oon enämen ko keksu eli leipä ja se maistuu ja täyttää mutta se oon kevveempi ko raskhaat päälysruokakakot.
Sie saatat varieerata; täytä ja lissää siihen erilaissii höystöi ja ainheita mitä sie halluut. Sie saatat eksperimenteerata perusreseptiiki.
– Mutta teekakkoreseptissä ei kuitenkhaan ole niin suuri variasuuni ko mitä lepsureseptissä, Åshild sannoo.

Kvensk oversettelse: Liisa Koivulehto