Kieliraatin konttori Uslussa. (Kuva: Språkrådet)
Kieliraati tarvittee heti uuđen kainun kielen työtelijän.
Liisa Koivulehto
liisa@ruijan-kaiku.no
Kväänin paikannimipalveluksessa aukkee virka. Katriina Pedersen, joka oon ollu virkavaphaala tästä virasta vuođen aijan, oon päättäny ette hän ei pyörrä takasin vanhaassheen työhön. Virka tullee hajettavaksi.
– Työpaikka-anonsi tullee näkkyyville muutaman päivän jälkhiin meän nettisivule sekä sinne missä oon muitaki työpaikka-anonsii, seksuuninjohtaaja Daniel Ims Kieliraatista sannoo.
Se oon täysi virka. Työpaikka oon ensinä Uslu missä oon Kieliraatin konttorit, mutta se oon mahđolinen tehđä työn muuvalaki.
Työtä riittää
Katriina Pedersen oon ollu Naavuonon kielikeskus – Návuona Giellaguovddáš – Kvænangen språksenterin kväänin kielen konsulentti februaarikuusta lähtiin. Hän päätti syksylä ette hän halluu jatkaat tätä työtä.
– Täälä oon nokko työtä ja mie olen triivastunnu, Katriina Pedersen sannoo.
Hän tykkää tehđä konkreettista kielityötä: Opettaat kieltä koulussa ja kursila.
– Se oon pientä työtä mikä ei nävy meediassa eikä sitä saata mitata numeroila. Kielen oppiijalle – ja minule – se oon kuitenki iso silmänräphäys ko hän sannoo jonku sanan eli lausheen kvääniksi oikheessa tilantheessa, hän sannoo.
