Pusser opp gården: Raymond Olusen blir boende i Skallelv når han på nyåret er på plass som daglig leder for Vadsø kvenske språksenter. (Foto: Maureen Bjerkan Olsen)
Raymond Olufsen aikoo oppia kvääniä.
Liisa Koivulehto
liisa@ruijan-kaiku.no
Raymond Olufsenin valithiin Vesisaaren kielisentterin uueksi johtajaksi novemperikuussa. Hän muuttaa Båtfjordista Vesisaarheen januaarikuun 17. päivän jälkhiin ja alkaa sitte työtelemhään.
Olufsen oon Båtsfjordista, syntyny 1975. Hän oli monta vuotta etelässä mutta sitte hän palasi pohjaisheen. Hän oon opettaaja. Hän oon opiskellu informasuuniteknologiita, johtamista ja innovasuunia. Hän oon kans työtely Uslussa Kirkon kaupunkilähätyksessä.
Hänelä oon vuuesta 2014 ollu oma firma minkä ala oon elämänkeinoin kehittäminen, markkinahommat ja kulttuurijohtaminen.
Tykkää oppia kieliä
– Mutta kunka se oon kväänin eli suomen kielen kans?
– Mie aijon alkaa oppimhaan kvääniä heti ko mie tulen Vesisaarheen. Aijon ilmottaa itteni universiteetin kursile ja hajen muuvaltaki mitä kursii oon olemassa. Vesisaaressa minula oon kans kväänin eli suomenkielisiä tuttuja, Olufsen muistelee.
Tyskä ja engelska oon hänen vahvimat vierhaat kielet.
– Mie puhun tyskää ja engelskaa mutta mie olen plokanu moniä kieliä ko mie olen reisanu, siksi ette mie saattaisin puhua ees jotaki ihmisten kans. Ja Uslussa mie opin vähäsen rumenskaa, kuitenki niin paljon ette ko ihmiset puhuvat rumenskaa, mie ymmärän liki puolet, Olufsen sannoo.
Oma oppiminen oon yksi asia. Toinen oon kunka saaha toisetki oppimhaan kvääniä eli suomea Vesisaaressa.
– Met tarvittema oppimateriaalii lapsile, miljöön, verkoston ja yhteisiä tapattumia. Mie aijon ottaa paikala kontaktin Lemmijoven kielimiljöön kans, hän suunittellee.
Raution sukua
Hänen äitin äiti puhui suomea ennen ko nai Vuorehaan mutta hän oon jo kuolu. Kallijovessa asuu kuitenki vanhaa sukulaismies Karstein joka puhuu suomea. Olufsen aikoo asua Vesisaaressa mutta hän aikoo kylästellä Karsteinin tykönä ja pittää häntä silmälä.
Karstein oon Raution sukua – niinko monet muutki Kallijovessa missä oon kaksiki tämännimistä sukua.
Olufsen muistelee ette hän soittaa bassoa ja kitaraaki. Hän toivoo ette hän löytää Vesisaaresta muitaki musikkeriita kenen kans hän saattais pelata kväänimusikkia.
