Kinnermäjen kylä oon säilyny satojen vuosien aijan. (Kuva: Martti Penttonen)
Karjalan tasavalta oon defineerannu Kinnermäjen kulttuurihistooriseksi suojelukohtheeksi.
Liisa Koivulehto
liisa@ruijan-kaiku.no
Kinnermäjen (ryssäksi: Kinerma) karjalaiskylä oon ainaki 500 vuotta vanhaa. Kylän oon hävitetty monta kerttaa mutta sen oon aina rakenettu uuesti, piian siksi ette paikka oon niin mainio: Mettän keskelä oon korkkeempi paikka ja talot oon rakenettu siihen, niinko perinne oon Karjalassa.
Harvinainen kylä
Kylä oon aina ollu Ryssän puolela, mutta liki vanhaan Suomen rajjaa. Kylä oon kestäny sekä monet sođat ette neuvostoaijan, mikä oon harvinaista. Kylässä oon 16 oon talloo. Kylän keskelä pienessä mettässä oon kolme sattaa vuotta vanhaa tsasouna eli kappeli.
Vanhiimat huonheet oon 1800-luvulta ja 1900-luvun alusta. Huonheet oli huonossa kunnossa mutta 20 vuotta aikkaa Oulun universiteetin arkkitektifaakin ihmiset kiinostuthiin kylästä. Sen jälkhiin kaikki rakenukset oon dokumenteerattu ja joitaki oon restaureerattu.
Uusi aika alkanu
Meininkinä oon ette Kinnermäjestä tullee oikkee karjalaiskeskus, jossa voi ellää ja saaha elatuksen. Ensimäinen nelihenkinen peret oon jo muuttanu sinne pyssyyvästi asumhaan. Heän lisäksi kylässä assuu 86-vuotinen Ivan.
Vuuen aikana Kinnermäjessä käy seittemän tuhatta turistii: ryssii, suomalaissii, eestiläissii, ruottalaissii; europpalaissii, aasialaissii… Nadja Kalmykova – joka oon Olga Gokkoevan sisar – tekkee turistiile ruokkaa ja hänen mies viljoo maata.
Kinnermäjessä oon kans museuumi ja kaksi savusaunaa mitä laikothaan turistiile. – Tulgua terveh! Tulgua käymäh! Olga Gokkoeva sannoo.
