Sigmund Løvåsen oon raatinjohtaja Kulttuuriraatissa. (Kuva: Mats Bakken)
Rahat maholistaavat sen ette saatethaan kehittäät, dokumenteerata tahi vahvistaat uussii ja etableerattui kulttuuriaktööriitä.
Pål Vegard Eriksen
pal@ruijan-kaiku.no
Suurin osa tekstistä oon Kulttuuriraatin nettisaitista:
– Alkupöräiskansa ja kansaliset minoriteetit oon Norjassa histoorian aikana kokenheet – ja vieläki kokkeevat – ette heitä systemaattisesti panhaan syrjhään ja heiltä vailuu hyväksyminen kansalisessa kulttuurielämässä.
Näin sannoo Sigmund Løvåsen, Kulttuuriraatin raatinjohtaaja.
– Met halluuma jatkossa eesauttaat paremin sitä ette alkupöräiskansan ja kansalisten minoriteetiitten maholisuuet dokumenteerata, toimiit ja eistäät heän kulttuurii ja taietta lujitethaan, hän sannoo.
Tausta oon ette Kulttuuriraati nykysin laittaa hajettavaksi 4,5 miljoonaa kruunuu. Rahat maholistaavat sen ette saatethaan kehittäät, dokumenteerata tahi vahvistaat uussii ja etableerattui kulttuuriaktööriitä joila oon saamelainen tavus tahi jokka kuuluuvat kansalishiin minoriteetthiin, kväänit myötälukkiin.
Satsaus anttaa maholisuuen ottaat vaarin kansanjoukkoin histooriasta ja kulttuuriperinöstä, mutta se kans auttaa kehittämhään uussii organisasuuniita, kompetanssii, verkostoi, pytinkkiitä ja mööttipaikkoi tulleevaisuutta varten.
Toimirahat oon jajettu kolmheen oorninkhiin:
2 miljuunaa kruunuu kulttuuriaktööriitten kehitystoimi-oorninkhiin, jolla oon hakemafristi 4. marsikuuta, ja 1 miljuuna pytingiitten ja infrastruktuurin ARENA-kuurto-oorninkhiin, jolla oon hakemafristi 3. juunikuuta, ja sitten 1,5 miljuunaa kruunuu kulttuurisuoja-prosektikuurthoon. Hakemafristit täälä ovat 4. marsikuuta, 3. juunikuuta ja 2. septemperikuuta.
Les saken på norsk:
