Det kvenske koret Kvääniäänii hadde tre felleskonserter med bandet Julma under Paaskiviikko. Repertuaret var mye av det samme som før, men med nye og svingende arrangement. KUVAT: LIISA KOIVULEHTO
.
Musiker og kulturarbeider Jan Johansson fra Tornedalen (Jord, Julma) sier at koret Kvääniäänii er spennende med sin blanding av ungdommer og voksne.
Kvääniäänet laulethiin rokkii tornionlaksolaisen bändin Julman kans kolmessa konsertissa.
Liisa Koivulehto
liisa@ruijan-kaiku.no
Kainulaiset pörinelaulut passathaan monenlaisheen meininkhiin niinko vaikka rokkhiin. Tämän kuulthiin ensi kerran Paaskiviikola. Ensimäinen konsertti oli Yykeänperässä ja toiset Olmaivankassa ja Raisissa.
Äänimiehet ei olheet säästelheet mithään ja salin eđessä äänipaarot tunnuthiin kropan sisälä muuvalaki ko korvassa. Ikkunat helisthiin ja laattii heilui ja kovaääniloovat hypithiin ilmassa.
– Dette var en stor opplevelse! Æ kosa mæ hvert øyeblikk! sa dirigent Tove Reibo etter første konserten i Storfjord.
Kaivuonolainen Line Evensen oli aivan tyhvä konsertin jälkhiin.
– Met olema treenanheet tämän prosjektin 16. marsikuuta. Kuorhoon oon tullu uussii jäseniitä ja saama kielen kuulumhaan, hän iloittee.
– Mutta nyt mie tarvitten juođa vettä!
Yykeänperän konsertti oli sillankorvan pubissa. Publikummina oli eniten lasten vanhemppii ja isovanhemppii mutta muutampi oli tullu sinne kauvemppaaki.
Arrangeerathiin uuđesti
– Kunka tet tämän hoksasitte?
– Joo, met halusimma enämen vauhtii ja ääntä! dirigentti Tove Reibo muistelee.
– Met olema arranseeranheet vanhaat laulut uutheen laihiin. Hajima ja saima kuurttoo systeemistä minkä nimi oon «Frifond kompetanse og aktivitet» ja sitte Line Evensen ja mie lähimä käymhään Pajalassa Julman poikitten tykönä. Sielä met sitte proovasimma erilaissii alternatiiviita ja kuuntelimma miltä se kuulostaa ja sitte päätimmä kunka met sen halluuma tehđä, Reibo muistelee.
– Aivan erityinen kuoro
Jan Johansson oon ollu monen vuođen aijan Paaskiviikola ja muutenki pitämässä kainun nuorile laulaajille ja soittaajille kursii. Jokku nuoret oon olheet myötä jo usseeman kerran.
– Kvääniäänii oon aivan erityinen kuoro. Se oon jännittäävä ko kuorossa oon myötä sekä nuorii ette raavhaita. Nuoret oon niin innossa ja mie näjen ette het oon kehittynheet. Tove Reibo oon hyvä dirigentti ja se oon soma nähđä kunka tämä mennee etheenpäin, hän praamaa.
Lissää laulaajii tullee koko aijan
Kvääniääniissä oon sekä vanhoi ette nuorii. Reibo meinaa ette kontinuiteetti oon hyvä ja ette se näyttää ette laulaminen oon intresssanttii.
– Kvääniääniilä oon fasta laulutreeni kerran kuukauđessa ja lisäksi olema treenaneet monta kerttaa tämän prosjektin kans. Tämän prosjektin aikana meile oon tullu muutampi uusi nuori Omasvuonosta.
– Kunka monta teitä nyt oon?
– Jaa sitä mie en oikkeesti ossaa sannoot… mutta uussii oon tullu koko aijan enkä mie tieđä kethään joka olis lopettannu!
