Ulike høvler som Alf Einar Hansen mener tilhører den kvenske kulturen og neppe den samiske. – Feilregistreringen er massiv, sier kulturminnekjenneren. (Foto: Arne Hauge)
Tietämättömät oon rekisteröinheet kväänitavaroita saamelaisiksi.
Arne Hauge
arne@ruijan-kaiku.no
– Eihään tämä ole oikhein.
Alf Einar Hansen näyttää höylää jonka oon yksi kvääni oon tehny, omistannu ja käyttäny. Mutta se oon rekistreerattu saamelaiseksi – piian siksi ette se tullee saamelaisalan komuunista.
– Semmoistaki oon tapattunnu ette kväänitalon rekistreerathaan saamelaiseksi koska sielä oon joskus ollu saamelainen tyttö piikana, Hansen sannoo.
Kainulaisia ei tunneta
– Melkkein kuka tahansa oon päässy rekistreeraamhaan, ilman ette hänelä oon ollu mithään oppia. Meilä oon hirmuinen työ jos halluuma selvittäät kaikki vääryyđet enkä mie en tiiä oonko se maholistakhaan, Alf Hansen sannoo.
Alf E. Hansen. (Foto: Arne Hauge)
Hän ei halluu uskoa ette tämä oon tapattunu vasiten vaan siksi koska net jokka oon rekistreeranheet ei ole tienheet tahi ei ole perustanheet kainulaisesta kulttuurista.
Vääryyđen häytyy oikaistaat
– Tämä oon kauhea vääryys sekä kainulaisia, saamelaisia ette Pohjais-Ruijaa kohthaan! Met vaađima ette histoorian esitethään oikhein. Saamelainen kulttuuri oon tarpheeksi rikas ja pärjää ilman vääryyttäki. Mie en usko ette het ittekhään haluthaan tämmöisiä valheita, Hansen meinaa.
Viranomaisten vastuu
Hansen meinaa ette vastuu vääryyđestä oon viranomaisila jokka oon perustanheet tämän systeemin.
– Viranomaiset oon tehnheet maholiseksi meän kulttuurimuistoin ryöväämisen. Meän identiteetin oon ryövätty ja histoorian esitethään väärin. Systeemin häytyy paranttaat.
Kvensk sammendrag ved Liisa Koivulehto
