OLYMPUS DIGITAL CAMERA
Pohjais-Hålogalandin hiippakunta meinaa ette Ruijan kirkko häyttyy ottaat eđesvastauksen kainunkielisestä kirkonelämästä.
Liisa Koivulehto
liisa@ruijan-kaiku.no
Hiippakunnan raati päätti tämän yksimielisesti 11. maikuuta. Raati oli päätöksessä vieläki selkkeempi ko mikä esitys ensin oli.
Hiippakunnan raati vaattii ette Ruijan kirkkoraati häyttyy käsitellä assiin. Het pyyđethään kans ette kirkkoraati järjestää vuona 2018 konferenssin missä selvitethään kväänin kirkonelämän tillaa.
Raatin päätös oon selkkee signaali kirkkoraatile.
Paljon vailuu
Kainun kirkonelämän työjoukko sannoo ette se vailuu monta assiita mitä tarvithaan kainunkielisessä jumalanpalveluksessa: liturgiita, raamatuntekstii, rukouksii, virssii ja liturgista musikkii.
Piispa Öygard meinaa ette se oon luonolinen ette työ tehđhään pohjaisessa.
– Eninosa kainulaisista assuu meän hiippakunnassa. Meilä oon monta pappii jokka saatethaan kväänii ja monet ihmiset työtelhään kainun kirkonelämän etheen eriliikaisesti Porsangissa ja Pohjais-Tromssassa. Mutta kainulaissii assuu koko maassa, eikä meilä ole resurssii tekemhään kaikki työt, Öygard sannoo.
– Jäljelä oon vielä iso työ. Meilä oon kompetanssii mutta meilä ei ole varroi tähään, kulttuurineuvooja Ivar Jarle Eliassen Pohjais-Hålogalandin hiippakunnasta muistuttaa.
Kirkko oon luvanu ottaat vaarin
Vuona 2014 Ruijan kirkonkokkous lupasi ette se ottaa vaarin kväänin kielestä ja kulttuurista sekä jumalanpalveluselämässä ette lasten ja nuorten uskonopetuksessa. Tämän moolin kirjoitethiin silloin dokumenthiin missä kirkon kaikki moolit oon lujeteltu.
Hiippakunnan raatin johtaaja Kai Krogh halusi tiettää käytethäänkö niitä kainun virssii mitä oon virsikirjassa.
– Kaikissa virsilauluilloissa missä mie olen ollu myötä, oon laulettu ainaki yksi kainun virsi. Ylheensä ruijaksi. Kväänikylissä se saatethaan laulaat usseempiki. Kainun virret oon hyvin meloodiset ja arvokhaat, Ivar Jarle Eliassen muisteli.
Omasvuonolainen Anne Dalheim pörhäänkuulutti iloisemppii virssii. Pietistiset virret oon usheesti aika synkät!
– Eikö Suomessa ole iloissii virssii? hän kysyi mutta ei saanu vastausta.
