Reidun Mellem og mannen Åge har gjennom årene stått i utallige stands og solgt hennes hefter og bøker om kvener og andre folk i Nord.-Troms, og nå kommer en samlet historie mellom to permer: Kvenfolkets 500 år ved Ishavskysten. KUVAT: LIISA KOIVULEHTO
.
Liisa Koivulehto
liisa@ruijan-kaiku.no
Reidun Mellem alkoi kirjoittamhaan kirjaa kainulaisten histooriasta jo vuona 2013. Silloin hän toivoi ette kirjan saattais anttaat ulos vuona 2014. Mutta siiheen ei saatu rahhaa. Se viipyi ja viipyi.
– Se oon toivet ette se tulis ulos nyt aprilikuussa, Mellem sannoo.
Marsikuun puolivälissä hän luki tekstin korrektuurin kolmanen kerran.
Kirjan aijothaan painaat heti tai se oon justhiinsa painettu Tromssassa.
– Ruijalainen kirjapaino oon tyyrhiimpi ko esimerkiksi eestiläinen mutta tietenki se oon helpompi ko sen painethaan täälä, Reidun Mellem tiettää.
Skenkki uusile jäsenile
Finansieeraamista oon auttanu ette Ruijan kveeniliitto aikkoo ostaat 250 kirjaa.
– Meilä oon ollut kauvoin tarvet tämmöiselle kirjalle missä muistelhaan kainulaista ja meän organisasuunista. Aijoma anttaat tämän kirjan skenkiksi uusiile jäseniille, kveeniliiton generaalisekretääri Ivar Johnsen muistelee.
– Kainulaisista oon kirjoitettu monta tutkimusta ja tietheelistä kirjaa. Niitä oon netissä ja biblioteekissä mutta kaikki ei pääse lukemhaan niitä ja kaikki ei eđes saata lukkeet niitä. Tämä ei ole tietheelinen kirja vaan semmoinen minkä jokhainen saattaa lukkeet, Johnsen sannoo.
Oma histooria
Reidun Mellem työteli koulussa koko työelämän aijan. Opettajantyön sivussa hän oon kirjoittannu pariki kymmentä häftii, muistelusta ja dokumenttikirjaa.
Se meni kauvoin ennenko hän päätti kirjan nimen «Kvenfolkets 500 år ved Ishavskysten».
– Minula oli työtitteli tietenki ensin mutta sitte mie näjin ette kirjan nimi häyttyy näyttäät meän pitkän histoorian Ruijassa. Mie muistelen siitä mitä met olema ja kunka viranomaiset oon kohđelheet meitä ja kunka meile ei ole annettu niitä oikkeuksii mitä meile kuuluu. Meät oon painettu alas ja piđetty alhaala, Mellem toteaa.
Hän oli Ruijan kveeniliiton puhheenjohtaaja vuosina 1997-2001. Hän meinaa ette kainulaiset saathiin äänen vasta ko Ruijan kveeniliiton perustethiin.
– Mie sanonki ette tämä kirja oon kainulaisten histooria sisältäpäin.
