Kveeniliitto siirsi konttuurin Langneshiin

Ruijan kveeniliiton konttuuri oon siirtynny kauvemaksi Tromssan keskikaupungista mutta likemäksi suurta trafiikkisentterii.

Liisa Koivulehto
liisa@ruijan-kaiku.no

 

– Tänne oon helppo tulla ja täälä oon hyvät parkkeerinkipaikat, kvääniliiton pääsekretääri Ivar Johnsen praamaa.

Konttuurin siirethiin 1. oktooperikuuta. Siirtämisessä oli apuna kvääninuorii ja muutampi heiđän ystäävä.

Johnsen kiittää eriliikaisesti Noora Ollilaa ja hänen hirmuisen vahvoi kaveriita.

– Heilä oli oikhein kilppailu siitä kuka jaksaa kanttaat kaikkiin eniten! Johnsen naureskellee.

 

Logistisesti mainio paikka

Kvääniliitto oli hakenu uutta konttuurii kauvoin. Vanhaa konttuuri oli haminapytingissä Tromssansaaren öystärannala, mutta laikkoisäntä halluu sinne nyt maritiimii aktööriitä.

– Met emmä halunheet keskikaupungile ko sielä oon ahđas. Tänne Langneshiin päässee sekä bussila ette biililä ja täälä oon paljon sijjaa. Ja flyyikenttä oon likelä! Se oon noppee nouttaat sieltä ihmissii mikä oon iso plussa, hän sannoo.

Uusi konttuuri oon kaksikertaisen, valkkeen talon yläkerrassa. Talo oon 100 metteerin päässä kahdesta isosta putiikkisentteriistä.

Ingrid Birkelund tuli justhiinsa käymhään. Hän halusi kattoot kväänipuvun kangasta yhtä työtä varten.

– Mie osasin oikhein hyvin tänne. Se oli helppo tulla, Birkelund sanoi.

Uuđessa konttuurissa ei ole ollenkhaan laakeriita eli puotii.

– Mie häyđyin heittäät pois paljon paperii. Mutta minule tullee vielä iso työ ko mie sortteeraan kaiken mitä mie otin matkhaan. Sen mie häyđyn tehđä vähän kerrala, muun työn lomassa.

Kaikkiin aktuelliin assii, mikä ottaa aikkaa, oon Isontingan kommunaalikomitean kuulemistilaisuus oktooperikuun lopussa Uslussa.

 

Kaksi lommaa

Kvääniliitola oon kaksi lommaa. Molemat oon nuoin 12 neliömeetterii.

– Toinen loma oon webbi-, nuoriso- ja prosjektityötelijäle,  ja vierhaat saatethaan kans työtelä sielä ko oon tarvet ja sijjaa.

Samassa pytingissä oon usseen firman konttuuriita. Konttuurilomat oon pytingin etelä- ja pohjaiskyljilä ja keskelä oon paljon yhtheistä sijjaa.

Kvääniliiton konttuuri oon pohjaisen puolela. Ikkunasta näkkyy putiikkisentteri Öystä-Jekta ja vähän puita.

Johnsen näyttää minule yhtheislukaaliita: Iso mööttiloma 12 hengele ja pieni mööttiloma neljele hengele sekä kaffi- ja lunssiloma. Vestapäässä oon iso terassi missä oon lasiseinät: Se oon yhđensorttinen talvihaaki.

 

Vanhaa turkisfarmi

Johnsen muistaa ette hänen täđin miehelä, minkä nimi oli Korsberg, oli justhiinsa eli melkkein tällä paikala turkisfarmi 1960-luvun lopussa.

– Seđälä oli minkkii ja kettui. Mie muistan ette tänne tuli mutainen tie ja se taras haisi hirmuisesti. Täälä ei ollu mithään muuta ko se farmi. Mutta ko flyyikentän rustathiin ja siitä tuli isompi ja tuli enämen trafiikkii, setä lopetti sen farmin. Mutta sen tähđen ensimäinen putiikkisentteri minkä tänne rakenthiin, sai nimeksi Farmen, Johnsen muistelee.