«Mene ulos mailmale, elä sinun elämän ja ennen kaikkee tehe assiita kvääniksi.» (Illustrasjonsfoto: Heidi Garvo)
For sitt bidrag skrevet på kvensk valgte juryen å sende Aili Eriksen til topps i årets kvenske skrivekonkurranse. Her presenterer vi den litterære godbiten. Kanskje du forstår en hel del? Det er bare å lese og se.
Pito-ohjheet siitä kunka tulla kielenpittääjäksi KvääniKevät© produktin avula:
1. Pane KvääniKevät©-sipsin pääle.
2. Paina keltaisen knapin jos tarvittet hithaamppaa tahtii, ja paina punaisen knapin pääle jos tarvittet noppeemppaa.
3. For English paina sinisen knapin pääle.
4. Kuuntele kaikki sillä aikkaa ko sie nukut. Ko sie herräät niin puhut huilaavasti ja täyđelisesti kvääniksi.
Feilimellingiitten varalta:
1. Paina vihrisen knapin pääle.
2. Mene kielikursile, osta oppikirjat ja grammatikin. Piđä kans sanakirjaa, mutta muista ette sie häyđyt itte käyttäät kieltä.
3. Äla freistaa oppiit kaikkee samhaan aikhaan.
4. Opi ensiksi helppoi assiita. Valitte mikkä assiit pittää oppiit ensiksi, esimerkiksi färit, numerot ja helpot fraasit.
5. Kirjoita sinun moolit jonneki missä sie näjet net ja työtele kielen kans ainaki yhđen tiiman päivässä.
6. Paina oransin knapin pääle.
7. Harjoittele ääntämisreekeliitä. Luje joitaki setninkkiitä äänheen joka päivä.
8. Ko se alkkaa olemhaan helppo, niin luje lyhykäisen tekstinosan äiđinkielisele tahi ihmiselle joka saattaa sannoot jos sie äänät jotaki väärin.
9. Kuuntele neuvoi ja kritikkii silloin ko se oon hyöđylinen. Muutoin älä ajattele liika sitä ette häyttyy olla täyđelinen. Puhuminen tullee olemhaan enämen luonolinen jos se ei koko aijan ole mielessä.
10. Paina fioletin knapin pääle.
11. Haje kvääninkielissii ihmissii. Jos mahđolinen puhu kaikile kekkä saatethaan kieltä.
12. Älä mene pois ko ihmiset puhuthaan kväänii. Sovi heiđän kans ette sie saat kuunela. Sitte kuuntele ja kysy mitä sanat meinathaan.
13. Piđä niitä mahđolisuksii mikkä oon olemassa. Jos se oon sinusta ok, niin kuuntele assiita meänkieleksi ja suomeksi, ko oon samat ääntämisreekelit. Alussa tärkkein oon ette pystyt erottamhaan sanat toisisthaan, ko sitte saatat helpomin kyssyyt sanoista.
14. Kirjoita sinun kauppaamalistat kvääniksi ko sie menet ruokakaupphaan.
15. Piđä sommaa kvääniksi, laula, pellaa prettapelii, kuđo kväänivantthuut tahi laita ruokkaa ja luje reseptii, tieraa lasten kans tahi kirjoita vaikka päiväkirjan kvääniksi.
16. Sen myötä ko sie muistat esimerkiksi numerot ja ruokkiin nimet, niin anna ittelesti uussii assiita mitä oppiit. Anna ittelesti enämen ja enämen vaikkeet assiit.
17. Paina pinkin knapin pääle.
18. Kirjoita lyhykäiset mellingit toisile jokka oon oppimassa kieltä tahi kirjoita vaikka naamakirjapostaukset kvääniksi.
19. Sen varalta jos kojet ette kielipulettia tullee, hätäulko-ovi oon oikkeele, trappui ylös ja sitte ulos.
20. Se auttaa tietenki jos sie pystyt yhđistämhään kielen oppimisen assiisseen mistä sie olet jo intresseeranu. Se saattaa auttaat ko pittää oppiit uussii sannoi.
21. Jos sie vaivut niin muista kans pittäät pausin kväänihommista.
22. Jos et pysty puhumhaan äiđinkielisille, niin ala puhumhaan muile studentiile jokka oon kursiila. Ja jos se auta niin puhu ittelesti.
23. Tutustu ihmishiin kvääniksi. Sitte se tullee olemhaan normaali kielivalinta. Alatta siitä ette praatitta assiista mikkä oon opphaat.
24. Paina turkiisin knapin pääle ja pane tämän kampheen pois.
25. Mene ulos mailmale, elä sinun elämän ja ennen kaikkee tehe assiita kvääniksi.
Met toivoma ette meiđän KvääniKevät©-produktin avula sie sautat sinun moolin ja sinusta tullee kielenpittääjä. Jos sie et ole tytyväinen, niin meiđän produktilla oon viisi vuotta garanttii.
Aili M. Eriksen. (Foto: Privat)
