Samefolkets dag, torsdag 6. februar 2020. Vi gratulerer. (Foto: Arne Hauge)
Onnee päiväle!
Liisa Koivulehto
liisa@ruijan-kaiku.no
Saamen viikon aikana Tromssassa oon monenlaissii tapattummii, sekä sporttii ette kulttuurii, sekä lapsile ette raavhaile ja turistiile kans. Kunstinäyttelyitä, markkinat, workshoppii ja filmii.
Viralinen juhla oon Tromssan raatihuonheessa tääpänä klo 15 alkkain.
Isoin tapattuma oon pyhänä ko oon poronajonkilppailu ja suopunginheittikilppailu Ruijan mestaruuđesta. Net oon torila ja Storgatala ja koko sentrumi oon täynä ihmissii.
Ottar-häfti
Tromssan universiteetti oon viettäny saamen viikkoo jo monta päivää.
Tääpänä universiteetissä oon kaksi tapattummaa: Pääjuhla oon päivälä Aurinkohallissa ja illalla oon seminaari minkä aihet oon rasistiset ajatukset minoriteetiista ruijalaisessa meediassa. Mitä net oon ja ottaavatko meediat niistä profiittii?
Perjantaina Tottuuskomisuunin Ketil Zachariassen muistelee komisuunin työstä Kvalöyan jatkokoulussa ja Tromssan museuumissa oon tutkiija Ivar Bjørklundin 70-vuotisseminaari.
Lauvantaiuniversiteetissä Hilde Sollid kyssyy kunka saamen kansan päivä näkkyy ruijalaisessa koulussa.
Tromsø museum har gitt ut et Ottar-hefte om Nils-Aslak Valkeapääs liv og virke.
Maanantaina Tromssan museuumi antoi ulos uuđen Ottar-häftin minkä aihet oon multikunstnääri Nils-Aslak Valkeapään (1943-2001) elämä ja merkitys. Hän oli muusikkeri ja kuvakunstnääri, hän kirjoitti ja vaikutti yhtheiskunnassa. Hän lauloi, pelasi, joikasi ja komponeerasi. Hän kirjoitti diktii ja mielipitheitä. Hän tägnäsi, maalasi, otti kuvvii ja pelasi teatterrii.
Valkeapää pelasi 1970-luvulta lähtiin yhđessä suomalaisten muusikkeriitten Esa Kotilaisen ja Paroni Paakkunaisen kans. Suomessa hänet tunnethiin nimelä Ailu. Kotilainen, joka pellaa syntetisaattorii ja tangentti-instrumenttii, muisteli Tromssassa kunka Ailun musikki vaikutti ja muutti hänen ommaa pellaamista.
Den finske musikeren Esa Kotilainen spilte sammen med Nils-Aslak Valkeapää fra 1970- til 1990-tallet. Mandag var han i Tromsø og fortalte om samarbeidet og hvordan Valkeapääs musikk har påvirket hans måte å spille på. Kuva: Liisa Koivulehto
