Lönnroots halluu muistela suomalais-ugrilaisten minoriteettiin tilasta isole publikummile.

Liisa Koivulehto
liisa@ruijan-kaiku.no

Lönnroots oon sekä dokumenttii tekkeevä joukko ette pieni bändi joka soittaa kansanmusiikkii. Heilä oon meininki tehđä monta dokumenttifilmii suomalais-ugrilaisista kansoista netthiin.

Setomaa-Kainunmaa-Karjala

He aloitettiin viimi vuona Eestin Setomaala ja tänä kesänä het käythiin Pohjais-Ruijassa opastumassa kainulaishiin.

Ensi vuona het aijothaan mennä Vienan Karjalhaan.

 – Sen lisäksi ette met freistaama löyttäät ja dokumenteerata suomalais-ugrilaisen kulttuurin staatusta ja kattela tulevaisuuđen mahđolisuuksii, met freistaama kans oppiit kieltä. Reissun aikana met tehemä uuđen kansanlaulun tällä kielelä ja esitämmä sen mahđolisimman isole joukole reissun lopussa, Lönnrootsin Jonne Putkonen selvitti reissun ideaa epostissa ennen ko het tulthiin tänne.

Joukossa oon lisäksi Juho Hannikainen ja Jaani Leinonen.

Kainulaisten jäljilä

Juulikuussa het käythiin ensin Tromssassa missä het kyselthiin kaupungilla mitä ihmiset ajatelhaan kainulaisista ja kainun kielestä. Yykeänperässä het kohđatelthiin «mailman nuoriman kainunkielisen» Noora Ollilan, ja sieltä het jatkethiin Pyssyjokheen Kipparin festivaalile.

Koko reissun aikana het kyselthiin ihmisiltä kainulaisista ja kainun kielestä ja samala het keräthiin sannoi.

– Musikki oon avvain kulttuurhiin

– Minun kokemus oon ette musikki oon avvain usseimphiin kulttuuriihiin. Musikin kautta met saama toisenlaisen perspektiivin ihmishiin ja kielheen, Lönnrootsin pojat meinathaan.

Jonne Putkonen hoksasi tämän itte muutampi vuosi aikkaa ko hän muutti Eesthiin. Hän opetteli kieltä tekemällä musikkii eestiksi. Tämä oli hänele inspirasuuni koko Lönnroots-prosjekthiin.

– Se oon aika viekas tehhä laulu kielelä mitä sie et oikkeesti ossaa. Mutta kyllä ihmiset oon tykänheet ko met freistaama! Met olema saanheet positiivissii kommenttiita ja ihmiset oon nauranheet ja se oon hyvä, Jonne Putkonen muistelee iloisena.

Kainulaislaulu ei keriny tulla valmhiiksi Kipparin festivaalila ko vasta Varengissa. Het filmathiin sen sielä ja lastathiin sen heti ylös netthiin.

Filmi tullee vuođen päästä

Setodokumentti oon valmis tänä syksynä ja sitte het alethaan työtelemhään kainulaisfilmin kans.

– Filmiistä tullee noin 40 minuttii pitkät ja niihiin tullee engelskankieliset tekstit. Se oon meininki ette kainulaisfilmi tullee valmhiiksi nuoin vuođen päästä. Laitama filmit netthiin mutta niitä saattaa kans näyttäät festivaaliila, Juho Hannikainen sannoo.