Alle foredragene på Meänkieliseminaari 2020 skal bli synlige på kieliarena.com/video og youtube.
Kieli oon paljon enämen ko puhetta ja tekstii.
Liisa Koivulehto
liisa@ruijan-kaiku.no
– Kieli oon kommunikasjuunii, interaksjunnii, kuuntelemista ja muistelemista, leikkii, tuntheita, ajatuksii, fantasiita, aktiviteettii, liikettä ja kulttuurii, sannoo Marja-Leena Kivelä.
Kivelä oon käänttääjä ja ruottin kielen opettaaja Oulun universiteetissa.
Hän saarnasi Meänkielen seminaarissa 13. novemperikuuta. Saarnan aihet oli Kreatiivinen kielenopetus. Meänkieliseminaarin 2020 piethiin digitaalisesti.
Yksi sentraali teema Kivelän saarnassa oli: Kunka met opima uuen kielen eli opetamma ommaa kieltä esimerkiksi lapsele?
Vierhaan eli uuen kielen oppimisessa oon sama prinsiippi ko äidinkielen oppimisessa: Sie opit parhaiten tekemällä ja sie muistat parhaiten uuet sanat ko kaikki aistit oon myötä. Musikki ja draama oon hyvät keinot.
Ko lapsi oppii kieltä, hän ei aluksi puhu eikä vastaa. Mutta vaikka lapsi oon vaiti, hän ymmärtää kuitenki ja reageeraa kropalla. Kivelä neuvoo monenlaissii leikkii missä käytethään justhiinsa tätä prinsiippii.
Hän muistuttaa ette vaikka lapsi ei puhu eikä vastaa, se oon tärkkee ette sie puhut hänele maholisimman paljon niin ette lapsi saa kielellissii stimulanssii.
– Käytä aina kokonhaissii sannoi ja täyelissii lausheita. Lapsi ymmärtää lausheen merkityksen vaikka hän ei ymmärtäis kaikkii sannoi. Ja muista kolmen reekeli, se meinaa ette repeteeraa tärkkee sana kolme kerttaa. Esimerkiksi ko näjettä linnun, sie saatat sannoot: Kattopa tuota linttuu! Oonpa se fiini lintu. Nyt lintu lenttää.
Kivelä saarnasi ruottin kielelä ja hänen saarnan voi kuunela tässä.
