– Met kuttuima kuningattaren Kipparin festivaalile!
Kainun institutin kieli- ja kulttuurityötelijä Karin Larsen ja kvääninuori Noora Ollila olthiin kuninkhaan ja kuningattaren haakijuhlassa Uslussa aukustikuussa.
– Kuningatar kysyi ette eikö juulikuussa Pyssyjovessa ole paljon sääskii. Mie sanoin ette juulikuussa oon paljon sääskii joka paikassa! Karin Larsen naureskellee.
– Mie olen optimisti! Aijon lähättäät kuningattarelle enämen tiettoo kainulaisista ja Kipparin festivaalista.
– Met kuulima kuningattaren puhheista ette hän tiesi kainulaisista. Muistelimma hänele Kainun institutista ja kainun kielityöstä, Noora Ollila muistelee.
Het kohđatelthiin kans pääministeri Erna Solberg.
– Met sanoima hänele ette hän ei saa unheettaa kainulaissii. Solberg muisteli ette hän oon käyny Pyssyjovessa ja institutissa ennen ko hänestä tuli pääministeri.
Kväänipuvussa Karl Johanillaki
Noorala oli kväänipuku päälä vaikka oli kuuma.
– Mie valittin sen siksi ko minut oli kuttuttu justhiinsa siksi ko mie olen kvääni. Tämä oon Line Evensenin puku, Noora muistelee.
– Ko mie kävelin kväänipuvussa Karl Johanilla, mie olin tosi ylppee ja iloinen! Jokku kattothiin kyssyyvästi – se oon siksi ko kväänipuku ei ole niin tunnettu.
Suuri elämys
Haakifästi kuningasparin tykönä oli molemille iso elämys.
– Met olima lykyliset ko saima olla myötä, tämä oon piian ainua kerta meile, het meinathaan.
– Se oli erityisen tärkkee ja niin soma saađa puhhuut kuningattaren kans, ko hän oon niin interesseerattu kulttuurista, Larsen muistuttaa.
