Reidun Mellem presenterte boka si på direktesending på NRK Troms 2. mai. KUVA LIISA KOIVULEHTO
– Mie hunteerasin kauvoin kirjan tittelii, ette häytyisinkö mie kirjoittaat siiheen ette tuhat vuotta sillä ko viikingit muistelthiin kainulaisista jo 800-luvula. Meän modernit kalttiit ei ole kuitenkhaan vanhemat ko 1500-luvulta, ja sillä mie kirjoitin ette 500 vuotta, kirjailija Reidun Mellem sannoo.
Liisa Koivulehto
liisa@ruijan-kaiku.no
Hänen uusiin kirja «Kvenfolkets 500 år ved Ishavskysten» tuli ulos aprilikuussa. NRK Troms pyysi hänet studihoon 2. maikuuta muistelemhaan kirjasta.
– Miksi sie halusit kirjoittaat kirjan kainulaisten histooriasta sisäpuolelta? studioisäntä Jörn Resvoll kyseli.
– No ko mie olen justhiinsa sielä sisäpuolela. En mie olis saattanu kirjoittaat sitä toisela tavala, Reidun Mellem vastasi.
Hän oon iloinen ja tytyväinen siitä ette hän sai muistela kirjasta ja kainulaisten assiista raatiossa.
– Piian se auttaa ette kirja tullee tunnetuksiki, hän arveli varovasti.
Terävää kritiikkii
Hän aloitti kirjan tekemisen vuona 2013 ja työteli sen kans 1,5 vuotta yhtheistyössä Kainun institutin kans.
Det faglitterære fond (säätiö mikä eđesauttaa faakilisen litteratuurin kirjoittamista ja ulosanttaamista Ruijassa) oon antanu kuurttoo kirjoittamisheen. Ko teksti oli valmis, hän lähätti sen etelhään kolmele forlaakile ette het arveltais sen. Kaksi forlaakii ei halunheet sitä mutta kolmas – joka oon ylheensä ollut radikaali – sanoi ette se oli kiinnostunnu.
– Het sanothiin ette het saatettais anttaat sen ulos jos mie pehmentäisin minun tekstii, mutta enhän mie siihen menny ko se oon justhiinsa se terävä kritiikki minkä mie halusin saađa esile, sannoo tämä 85-vuotinen kirjailija Reidun Mellem.
Ruijan kveeniliitto oon ostanu 250 kirjaa mitkä se aikkoo anttaat lahjaksi uusile jäsenille.
Trackbacks/Pingbacks