Suomen opiskelijoitten semesteri alkanu • Nytt semester for finskstudentene

Tromssan universiteetin suomen kielen opiskelijoitten syksysemesteri 2015 alkoi 17. augustikuuta. Ensimäisesä samlingissa oli paikala kaksi opiskelijaa.

 

Liisa Koivulehto
liisa@ruijan-kaiku.no

 

– Kolmaskin oon ilmoittautunnu, suomen professori Leena Niiranen kertoo.

– Lisäksi kaksi opiskelijaa aikoo seurata opetusta netin kautta, yksi Oslossa ja toinen Venäjällä eli näillä näkymin meillä olisi viisi opiskelijaa.

Suomen opiskelijoilla oon syksyn aikana nelje samlinkii ja sitte oon eksaami. Välilä oon obligatoorissii tehtäviitä.

 

Tillaa oon nokko!

Universiteetin Teorifagbyggetin viideolomhaan oon tullu kaksi opiskelijaa. Loma oon iso ja pöydän ympärille mahtuis sikkaristi kolmekymmentä henkkee. Heilä oon tillaa!

– Olis hauskempaa jos olis enämen opiskelijoita. Oon vähän tylsää ko met olema tyhä kaksi, Noora Ollila sanoo.

– Talvela meitä oli viisi!

 

– Kvääni ja suomi oon minun ässäkortit

Noora Ollila oon Kveeninuorten johtaaja ja hän oon ollu Kveeniluusi ja hän oon eđustannu kainulaissii monessa tapattumassa.

– Miksi sie opiskelet suomee?

– No sehään oon minun toinen äidinkieli ja mie halluun oppiit sen oikhein kunnola, kieliopin ja kaikki, Noora muistelee.

Hän ajattellee mitä hän halluu tehđä elämässä ja hän oon konkludeerannu ette suomen kieli ja kainun kieli tulhaan sikkaristi olemhaan siinä matkassa ja ette net oon hänele tärkkeet.

– Suomi ja kvääni oon minule «ässäkortit hihassa». Mutta se ei riitä ette sie ossaat puhhuut. Se häyttyy olla kans paperit!

 

– Opiskelen suomea koska haluan

Thomas Kjærstad oon Mosjöenistä. Hänelä ei ole kethään suomalaisii eikä kainulaissii sukulaissii eikä perhettä.

– Olen halunnut opiskella suomea monta vuotta, Thomas kertoo.

– Miksi?

– Aivan kielen takia. Tykkään suomalaisesta musiikista!

– Mikä bändi?

– Nightwish.

Hän on pysynyt bändin tykkääjänä solistin vaihtumisesta huolimatta.

Thomas sanoo että on mielenkiintoista oppia suomen kieltä.

– En tiedä miksi. Se on monimutkainen kieli!

– Oletko opiskellut muita monimutkaisia kieliä?

– Vähän saksaa mutta en kovin paljon.

– Luuletko että suomen kielestä on sinulle hyötyä?

– Ehkä. Nyt opiskelen suomea vain koska haluan sitä, Thomas Kjärstad sanoo.

 

Kväänitiettoo suomenopiskeljoile

Samlingin alussa, ko muistelhaan kunka kesä oon menny, Thomas muistelee ette hän oli kesälä Vaasassa suomen kielen kurssilla. Sielä oli noin neljekymmentä opiskelijaa monesta maasta. Tyhä kuusi oli Pohjaismaista.

– Pidin siellä esitelmän.

– Mistä aiheesta? opettaja Leena Niiranen kyssyy.

– Kveenistä!

Noora Ollila hymmyilee tytyväisenä vieressä. Ei tarvitte monta kerttaa arvata kuka oli antannu Thomakselle ideean ja tiettoo.