Kuvakaappaus YLEn nettisivulta. Kuva: Antti Pietikäinen
Auringon hituiset näkkyyvät meile kaunhiina taivhaanvalkkeina mutta aurinkotormhiin kätkeenttyy kans uhka.
Liisa Koivulehto
liisa@ruijan-kaiku.no
YLE Areenhaan tuli 1. desemperikuuta filmi «Revontulien armoilla». Sen oon tehny Simo Sipola ja filmissä näytethään kans muoniolaisen Antti Pentikäisen kuvvii ja filmii taivhaanvalkkeista – ja siitä kunka hän työtelee.
Taivhaanvalkkeita tutkithaan ympäri mailmaa: Europassa, Ameriikassa, Japanissa. Parhaat alat kuvvaamisheen ja raatiopaarujen vasthaanottaamiseheen oon erämaassa, kaukana kaupungiista. Suomessa tämmöinen paikka oon Sodankylässä. Sielä tutkithaan muun muvassa hyvin matalan frekvenssin VLF-paaruja.
Kuvausjoukko oon kuvanu taivhaanvalkkeita kans Ruijan puolela missä tutkiijat haluthaan selvittäät millä laila taivhaanvalkkeet vaikuttaavat elukoitten, esimerkiksi valhaitten, elämhään.
Vuona 1859 taivhaanvalkkeita näkyi Karibiala saakka, ja kompassit ja telegraafit menivät aivan sekaisin. Mitä se vaikuttais tänä päivänä, sitä kukhaan ei uskalla arvata. Mutta tutkiijat haluthaan tiettää! Auringosta tulleeva hituistormi saattaa topata flyyit, pilata satelliitit ja sotkeet elektrisiteetti- ja daattaverkot. Siksi oon tärkkeetä pystyyt ymmärtämhään milloin aurinkotormi tullee. Tutkiijat simuleerathaan daattamasiinissa minkälaissii seuraamuksii aurinkotormiista tullee. Korvaako Vlasiator-malli 200.000 satelliittii?
Sen tieđethään ette taivhaanvalkkeet liikuthaan nuoin 100 km sekunissa. Mutta milloin niitä tullee? Miksi iso purkaus vuona 2012 ei osanukhaan maapallole? Arvoituksii oon vielä paljon.
YLE TV1 keskiviikkona 4.12.2019 klo 19.00 – 20.00, uusinta maanantaina 9.12. klo 23.40 ja lauantaina 14.12. klo 15.10.
