Talitiaiselle maistuu talvela kuu ja talipallot. Kuva: Liisa Koivulehto
Talitiainen oon yksi tavalisimmista linnuista talviruokkimispaikoila.
Liisa Koivulehto
liisa@ruijan-kaiku.no
Talitiaisella oon keltainen vatta, musta pää ja valkkeet posket. Keskelä rinttaa kulkkee musta raita. Koirhaat ja naarhaat oon melkkein samannäköiset mutta koirhaan vatta oon vähän kirkhaampi.
Talitiainen oon suuriin tiaisista, siksi se oon latinaksi Parus major. Nimen tiainen tunnethaan lintukirjoissa jo 1745. Muita nimmii oon esimerkiksi makkaratiainen, makkarapeipponen, pakkais-tiainen, tinkinen, talitiitinen, talijussi, makkaratiijaanen ja talitintti.
Tiainen oon linnuista vanhiin, sanothaan Kalevalassa. Tiainen opetti Väinämöisen viljomhaan kaskee.
Tiaisheen liittyy uskomuksii: Jos tiainen lensi lehmän vattan ali, lehmä alkoi lypsämhään vertä. Ja ko tiainen löi ikkunhaan, niin heti tuli tuisku.
Tämä laji ei ole vaarassa. Talitiainen oon yksi Euraasian tavalisimmista lintulajiista.
Talitiainen ei ole siirtolintu: Se pärjää pohjaisessa talvenaikanaki. Se pärjää sekä mettässä ette ihmisten likelä.
Ko sie laitat linnuile ruokkimispaikan, se oon melkein sikkari ette ainaki talitiainen tullee. Talitiainen syö kaikkee: Siemenii, jyvvii, hyöniäissii, toukkii, lihhaa, kuuta ja puitten silmui. Se juopi mahlaaki.
Joskus sattuu ette talitintistä tullee petolintu. Yksi suomalainen mies oli vuona 2013 havainu ette talitintti oli tappanu ruokkimispaikala 20 pernapäätä ja punarinttaa (Carduelis flammea). Tämän vuuen januaarikuussa talitiaisparvi oli nokkinu lypsylehmii verile Pohjais-Suomessa. Tämmöinen oon kuitenki harvinaista.
Kalttiit: Antero Järvinen: Linnut liitävi sanoja (1991), Kaisa Häkkinen: Linnun nimi (2011), Wikipedia, is.fi/kotimaa, yle.fi
Ruokkiminen auttaa linttui pärjäämhään talven yli. Kuva: Liisa Koivulehto
