See oon soma. Ha-ha-ha! Den var artig.
Vitsii yksi
Lapsi kyssyy äitiltä:
– Mitä tehđhään vanhoile huonoile biiliile?
– Miepäs muistelen sinule, äiti vastaa.
– Joku biilimyyjä sannoo sinun isäle ette biili oon hyvä ja isä ostaa sen.
Vitsii kaksi
Ennen aikhaan nuoret miehet tappelivat fästiissä. Se ei ollu mikhään fästi jos ei tullu tappeluu.
Juhani oli kova tappelemhaan naapurikylän poikiitten kans. Kerran hän taas meni tappelun jälkeen hyysikhään pesemhään vertä pois. Hän katteli itteä peilistä.
– Voi senthään, hän kauhistui, – eihään minula ole ennää hamphaita ko parrii fästii varten.
Vitsii kolme
Peret oli käyny mettässä plukkaamassa sienii. Illala het laitethiin murkinaksi pottui ja sienisoossii. Soosissa oli kermaa ja kissa sai nuola talriikit. Mutta heti ko kissa oli nuolu ruvanloput, se alkoi väänttäämhään itteäns ja se näytti ko se olis kovassa piinassa. Sienet olthiin myrkyliset! Koko peret lähti paikala sairashuonheesheen missä heiđän vattat virutetthiin. Het olthiin hyvin murettunheet. Ko het päästhiin kothiin, kissa oli jo keriny synnyttämhään kaikki viisi poikkaa.
Vitsii nelje
Yksi mies oli kuulu siitä ette hänelä oli viisas koira.
– Joka päivä ko posti oon tullu, minun koira hakkee minule Altapostenin, mies praamasi.
– No mikä tuo oon! Ei se ole niin kumma. Monet koirat hakkeevat aviisin! miehele vastatthiin.
– Se saattaa tietenki olla niin. Mutta mie en ole yhđenkhään aviishin tillaaja.
Vitsii viisi
Mies kuoli. Hänen leski ringasi aviishiin ja kysyi mitä kuolemananonsi maksaa.
– Se maksaa 50 äyrii per millimeetteri, hänele vastatthiin.
– Voi kauhee, se oon tyyris! Minun mies oli melkkein kaksi meetterii pitkä.
