Høyres Geir-Inge Sivertsen berømmer Miljøpartiet de grønne for satsingen på kvensk valginfo. (Foto: Høyre)
Vihrinen miljööparttii oon antanu ulos vaali-infoo kväänin kielelä. Toiset ei ole ajatelheet assiita.
Liisa Koivulehto
liisa@ruijan-kaiku.no
Tromssan Ap:n fylkinsekretääri Randi Lillegård praamaa vihrissii.
– Fiini homma.
Hän sannoo ette Tromssan Ap ei ole hoksanu eikä ajatellu ette joku tarvittis ja halluis vaalimateriaalii kväänin kielelä mutta jos monet haluthaan sitä niin het kyllä saattais tehä sen.
Linkki: Valginfo på kvensk
Ihmiset ei kysy
– Meilä ei ole mithään kväänin eikä saamen kielelä näissä vaaliissa, Lill-Tove Ottesen Finmarkun Ap:stä muistelee.
Hän sannoo ette finmarkkulaiset ei ole pyytänheet infoo kvääniksi eikä saameksi.
– Mutta oon fiinii ette MDG oon tehny tämmöisen tevon.
– Oonko Finmarkun Ap:ssa politiikkeeriitä jokka profileerathaan ittensä kainulaisiksi?
– Joo, meilä oon Hilde ja Mona Skanke jokka työteleevät kväänin assiitten etheen mutta mie en muista kethään joka profileerais ittensä kainulaiseksi, fylkinsekretääri meinaa.
– Emme ole hoksanheet
– Oonko Höyrelä vaalimateriaalii kvääniksi? Aikkooko Höyre informeerata parttiin politikista, arvoista ja semmoisesta kvääniksi?
– Voi voi, meän parttiiprogamissa seissoo varmhaan jotaki kväänin kielestä ja kulttuurista mutta ei mithään kväänin kielelä. Met emmä ole hoksanheet ajatella ette se olis tarvet. Mutta se oon hyvä ideea, Tromssan ja Finmarkun Höyren kontaktipersoona Geir-Inge Sivertsen sannoo, ja praamaa MDG:tä hyvästä teosta.
