Sekretariatsleder Liss-Ellen Ramstad og kommisjonsleder Dagfinn Høybråten ba om utsettelse, og fikk det. (Arkivfoto: Heidi Nilima Monsen)
Pressimellinki 23.6.21.
Isontingan presidenttijoukko oon päättäny jatkaat Tottuuen- ja sovinonkommisjuunin raportin fristii 1. junikuuta 2023. Covid-19 pandemiin tähen oon kommisjuunin työ menny hiljemin etheenkäsin, ja kommisjuuni oon pyytäny pitemppää aikkaa mandaattiperiuudile.
Issoin syy pitemäle fristile oon pandemii. Tottuuen- ja sovinonkommisjuunin oon häytyny löyttäät uusi tappoi tehhä työtä; net oon olheet kotikontturi, telefuunipuhuttelut ja nettimöötit ja tapattumat. Kommisjuuni oon saattanu viä läpitte kuiten monet avvoimet möötit ja se ollu myötä monessa tapattumassa hyvviin koronatoimiin kans.
– Koronasuojelustoimet oon kuiten tehny sen, ette monet möötit ja osalistumiset oon häytyny siirttäät hiljemäksi. Monet ootethaan meitä paikale, ja meilä oon eessä hoppu nyt syksylä, sannoo sekretariaatinjohtaaja Liss-Ellen Ramstad.
Kommisjuuni oon ottanu vasthaan nuoin 370 persuunallista muistelusta, ja monet ootethaan ette het saahaan jakkaat heän kokemukset norjalaistamisesta ja epäoikkeuksista kommisjuunin kans.
– Kommisjuuni kokkee ette se oon monet kekkä haluthaan jakkaat heän oman histuurian norjalaistamisesta suulisesti – usseemat ko mitä ootethiin. Meilä oon just nyt pitkä ootuslista, ja met halluuma ette kaikki saahaan maholisuuen, sannoo Ramstad.
Monet arkiivit ja bibliuteekit oon olheet suljettu pandemiin aikana, ja se oon tehny kalttiitten noutamisen vaikkeeksi.
Tottuuen- ja sovinonkommisjuunin fristi oli alkupöräisesti 1. septemperikuuta 2022.
