Hvalsafarisesongen 2016-2017 har akkurat begynt. Indre havn i Tromsø kryr av safaribåter. Hvalguide-matros Lauri Pietikäinen på «MS Jacquelyne» tror at de vil få dobbelt så mange hvalturister enn i fjor. Innfelt: Lauri Pietikäinen sitt bilde av en spesiell spekkhogger.
KUVA: LIISA KOIVULEHTO
.
Sillin ja valhaitten saapumisesta Tromssan likivesile oon viimi vuosina tullu uusi, sikkari merkki kaamoksen likenemisestä.
Liisa Koivulehto
liisa@ruijan-kaiku.no
Valasturismibisnes oon issoontunnu ja issoontunnu joka vuosi. Viimi vuona se räknätthiin ette täälä oli 30 000 valasturistii.
– Mie arvelen ette tämän sesongin aikana se tuplaantuu, valasopas-matruusi Lauri Pietikäinen sannoo.
Hän oon työssä MS Jacquelynella mikä oon Tromssassa nyt toista sesonkii.
Vastuu merielukoista
Oktooperikuun lopussa Tromssan satama oli liki täynä valassafarilaivoi.
– Kaikki suurimat aktöörit oon kokkoontunheet tänne. Kaupungin turistiorganisasuuni tarkistaa ette kaikila laivoila oon sertifikaatit oorningissa ja ette kaikki aktöörit ymmärrethään mikä oon heän vastuu tuola merelä ja ko het liikuthaan merielukoitten keskelä. Tämä oon hyvä, luononystäävä Pietikäinen iloittee.
Vanhaa tuttuki oon jo tullu
Pietikäinen oon hyvälä mielelä uuen sesongin kynnyksellä.
– Mie olen kohatellu täälä jo yhen vanhaan tutunki! Se oon yksi vaakuna tahi miekkavalas millä oon hirmuisen pitkä, piian pari meetterii pitkä evä! Se liikkuu Vengsöyan, Gåsväärin ja Musväärin vesilä. Se oon hyvin eriskumhainen ja karismaattinen: Se oon aina vähän lauman ulkopuolela, se oon rauhalinen eikä se hypi niinko muut, Pietikäinen kuvvailee.
Kolme kuukautta
Sesonki kestää kolme kuukautta eli januaarikuun lopphuun.
– Nyt silli oon justhiinsta tulossa. Heti se alkkaa pakkaantumhaan syvemäle vuonoitten pöräle ja sen pörässä vaakunat ja niitten pörässä ryhävalhaat. Muutaman ryhävalhaan oon jo nähty, Pietikäinen muistelee.
– Seuraavalla viikola se alkkaa täysilä! Ensimäiset viikot oon jo melkkein buukattu. Tämä lähtee hyvin!
Yhteistyötä
MS Jacquelyne ottaa 30 matkustaajaa. Vähän niinko vanhaat kainulaiset jäämerenpyytääjät, heiläki oon muutampi toverilaiva minkä kans het tehhään yhteistyötä: «Leone», «Olav Ringdal»ja «Aurora Explorer» joka oottaa 140 matkustaajaa.
– Erityisesti mie olen, omasta puolesta, iloinen yhtheistyöstä Leonen kans sillä ko heilä oon sauna! Pietikäinen naureskellee.
Kolme kuukautta laivassa olis liian pitkä aika ilman saunaa.
Alkusesongin aikana Pietikäinen oon ainua opas Jacquelynellä mutta desemberikuun alussa, ko sesonki oon korkkein ja oon kovin hoppu, het saahaan toisenki opphaan ja hän oon kans suomenkielinen.
