Lingvist Pål Kristian Eriksen skal jobbe som rådgiver for Kvensk stedsnavntjeneste – Paikannimipalvelus i 2019. (Kuva: Privat)
Kieliraati oon löytäny oikhein sepän vikaarin Paikannimipalveluksheen.
Liisa Koivulehto
liisa@ruijan-kaiku.no
Niinko oon tunnettu, kväänin Paikannimipalveluksen neuvonanttaaja Katriina Pedersen alkkaa uuen työn Naavuonon kielikeskuksessa 15. februaarikuuta. Hänelä oon yhen vuuen permisuuni ja siksi Kieliraati häytyi löyttäät vikaarin.
Vikaarin otethiin omasta talosta, siksi ko vikariaatti oon niin lyhyt.
– Vikaarilla oon tarpheelinen kompetanssi tähän työhön ja hän tunttee prosessin. Nimikonsulentti Irene Andreassen jatkaa kans tässä työssä ja het tekkeevät työtä yhessä, Daniel Ims Kieliraatista muistelee.
– Met toivoma, ette Katriina tullee takasin, hän on seppä! Jos hän ei tule, met laitama viran hakhuun aukkeesti, Ims luppaa.
Seksjonssjef Daniel Ims, Språkrådet, Språkrøkt og språkrådgivning. (Kuva: Moment Studio)
Hän luppaa kans ette Kieliraati oon tulleevaisuuessa aktiivisempi ja osalistuu debattiihin mitä tullee aina ko kväänin ja saamen paikannimmii alethaan käyttämhään näkkyyvästi. Monet ruijankieliset luulevat ette kväänin ja saamen paikannimet ei ole oikkeita.
Lingvisti ja kirjailija
Saatama sannoot ette Kieliraati oon löytäny oikein supervikaarin: Pål Kristian Eriksen oon lingvisti, hän oon lingvistiikan tohtori (2006) ja hänen kirja «Nye språk i Norge» (Pax Forlag) tullee ulos februaarikuussa. Hän oon kiinnostunnu kaikista kielistä ja tunttee hyvin monta kieltä. Niinko suomen.
Hän työteli Helsingissä 2007-2008 ja hän luuli ette sielä hän saa oppiit lissää suomee.
– Mutta kaikki minun työkaverit olit ruottinkieliset! Mie sain puhhuut suomee tyhä vapaa-aikana.
Eriksen alkoi työtelemhään Paikannimipalveluksessa 1. januaarikuuta. Hän oon oppinu systeemit ja oon valmis ko Pedersen alkkaa toisen työn.
Hän ei ole saanu vielä yhtäkhään nimiassiita pöyäle ja sillä aikkaa hän kirjoittaa artikkeliita ja aviisikronikkii kväänin ja saamen paikannimistä.
Eriksen oon syntyny ja kasunu Etelä-Ruijassa ja opiskellu Tromssassa ja Uslussa.
– Pian mie olen kuitenki vähän kainulainenki. Minun isä oon Hammerfestistä ja hän oon tutkinu meän sukkuu. Meän nimi Eriksen tullee siitä ko yksi meän esivanheempi oli Erik Syväniemi, Paikannimipalveluksen neuvonanttaajavikaari muistelee.
