Suomi täyttää ensi vuona 100 vuotta. Tromssan ruijansuomalainen yhdistys – Norskfinsk forening i Tromsø aikoo juhlia sitä niin ette se näkkyy ja kuuluu kauvas.
Liisa Koivulehto
liisa@ruijan-kaiku.no
Suomi Finland 100v teema oon «Yhdessä». Tromssan ruijansuomalaiset oon tehnheet siitä oman versuunin mille het oon antanheet nimeksi «Yhdessä yli rajojen».
Heän ideea oli niin hyvä ette Suomen valtioneuvosto hyväksyi sen juhlavuuen osatapattumaksi.
Tromssan ruijansuomalainen yhistys halluu muistuttaa kunka likelä Suomea Pohjais-Ruija oon ja kunka ihmiset oon aina liikkunheet rajan yli. Suomalaisila oon ollu ja oon vieläki iso rooli pohjaisen alan kehityksessä vaikka heilä oon eri kieli ja kulttuuri.
– Meän mooli oon antaa Suomesta friski ja moderni kuva faktan ja huumorin avula. Halluuma näyttää kunka paljon innovasuunii Suomessa oon ja auttaa suomalaisii ja ruijalaisii saamhaan kontaktia, yhistys muistelee hakemuksessa.
Kolmeosainen
Prosjektissa oon kolme ossaa. Ensin oon valokuvakonkurransi «Yhdessä» mihiin haluthaan kuvvii missä näkkyy ruijansuomalaisten ja kainulaisten merkitys pohjaisruijalaisessa yhtheiskunnassa ennen ja nyt.
Konkurranssin ideeana oon ette norjansuomalaiset otethaan kuvia ittestä eli toisista työssä ja vapaa-aikana, sekä juhlassa ette arkipäivänä. Publikummi saa äänestää ja sitte valithaan parhaat kuvat. Parhaista kuvista tehhään valokuvanäyttely kevhäälä 2017. Uusien kuvien vieressä oon vanhoja kuvia ruijansuomalaisista: Näin kuvhiin tullee uusi perspektiivi.
Augustikuussa 2017 oon iso tapattuma Tromssan torila missä oon esilä suomalaista kulttuurii ja seppii suomalaisii. Torila esitelhään muun muvassa suomalaista ruokakulttuurii, elinkeinoelämää sekä saunakulttuurii. Yksi iso haavet oon ette sais emänänkantokonkuranssin kävelykadule! Lopuksi olis toritanssit.
Desemberikuussa oon tavalista fiinimpi ja isompi itsenäisyyspäivän juhla.
Yhtheistyökumppaniita kolmesta maasta
Yhistyksen plaana ja meininki oon sauttaa tuhansii ihmisii sekä median ette verkostojen kautta. Yhtheistyökumppanit tulhaan Suomesta (Enontekiö, Muonio, Kittilä, Kolari, Sonkajärvi, Rovaniemi ja Oulu) sekä Ruottista ja Ruijasta.
– Sikkarit yhtheistyökumppanit oon BusinessOulu, Pohjola-Norden, Pohjoiskalotin Rajaneuvonta, Ylläksen Hyvinvointikeskus, Ylläksen Markkinointi Oy, Solrug, Keisus sekä Mansköret Klossit Ruottin Tornionlaksosta, yhistys praamaa hakemuksessa.
Yhistys oon laskenu ette prosjekti maksaa 22 500 euroo tahi noin 200 000 NOK. Nuoin 25 prosenttii tästä olis ommaa rahhaa eli billettitienestii. Yhistys oon hakenu rahhaa Suomi Finland 100-ulkomaanprogammista ja freistaa löytää sponsoriita.
Näkkyyvä
Yhistys meinaa ette se sauttaa ison publikummin.
– Olemme erittäin kiinnostuneita tekemään laajempaa yhteistyötä. Laajempana yhteistyönä voisi olla esimerkiksi Suomen valtion edustajien saapuminen tapahtumiin tai taloudellinen yhteistyö. Tapahtumamme myötä tarjoutuu Suomelle mahdollisuus kehittää Pohjoismaista yhteistyötä. Olemme ideoineet myös Suomi100-puun istuttamista Tromssaan, jos se olisi mahdollista, muistellaan hakemuksessa jonka Suomen valtioneuvosto oon hyväksynny osana Suomi Finland 100-juhlintaa vuona 2017.
