Valtio oon antanu ulos ensi vuođen budsjettiehđotuksen. Kainulaisile luvathaan yhtä vähän ko enneki. Ruijan kveeniliitto meinaa ette hallituksela ei ole polittista tahtoo kainulaisten avustamisheen. Kveeniliitto muistelee pettymyksestä pressimellingissä.

– Ei mithään kainun oppimateriaalile eikä lastentarhaile. Ei filmiile, ei kainun museuumile. Ei tervheyđenhoithoon eikä kulttuurityöhöön. Eikä kainun institusuunit ja meedia saata tiettäät saađhaanko het kuurttoo ensi vuona, kveeniliitto kirjoittaa.

Museuumile ei mithään
Ruijan kveenimuseuumin nimmee ei eđes mainita. Museuumi sai uuđet tilat ja plaana oon ette se nostettais kansalisen museuumin tasala. Se haki 3,5 miljoonaa kruunuu mutta nyt museuumi ei tieđä saattaako se jatkaat ollenkhaan.

Kieliraatile lissää valtaa
Kainun institutti ja Ruijan Kaiku oli ennen omat, selkkeet postit Kulttuuridepartementin alla, mutta nyt net  oon siiretty Kieliraatin alle. Hallitus halluu lisätä Kieliraađin valtaa.  Kieliraati saa päätäät kunka rahat jaethaan.  Samasta rahasäkistä oon nyt monta ottaajaa.
– Totaalisumma ei ole yhtään suurentunnu, kveeniliitto huomauttaa.

Alaspolkkeeminen jatkuu
Kveeniliitto oon lukenu budsjettii ja räknänny ette hallitus halluu anttaat esimerkiksi Arctic Race-sykkelikonkurrasile enemän rahhaa ko kainulaisile.
– Hallitus halluu pittäät kainulaisten histoorian ja kulttuurin piilossa niinko ennenki. Budsjettiehđotus merkittee ette norjalaistamispolitikka ja kväänitten kielen ja kulttuurin alaspolkkeeminen jatkuu, kveeniliitto meinaa.

Yksi ainoo ilo
Budsjettiehđotuksessa oon kuitenki yksi iloinen uutinen – mutta siihen luvathaan tyhä sannoi, ei rahhaa.
– Hallitus muistelee ette se aikkoo syksylä alkkaat tekemhään kainun kielen plaanaa. Met olema pyytänheet tätä ja Europan raati oon vaatinu tätä Ruijan hallitukselta vuođesta 2007. Mutta tähään työhöön ei ole luvattu mithään resurssiita eikä emmekä met tieđä mitä tämä konkreettisesti meinaa. Sillä met emmä aijo riemuita, kvääniliitto kirjoittaa pressimellingissä.

 

Les saken på norsk her: – Kvenene ble sviktet igjen